मोबाइल चोरी र खरिद गर्ने दुवै पक्राउ

काठमाडौं । प्रहरीले मोबाइल चोरी र खरिद गर्ने दुवैलाई पक्राउ गरेको छ । भक्तपुर नगरपालिका-१० कमलविनायकस्थित पुस्कल रञ्जितकारले सञ्चालन गरेको मोबाइल पसलबाट चोरी गर्ने उनीहरुलाई प्रहरीले पक्राउ गरेको हो ।

पक्राउ पर्नेमा काभ्रेका जिनलाप घिसिङ तथा चोरीको मोबाइल किनबेच गर्ने लमजुङका रामशरण अछामी हुन् । यसअघि फागुन २४ गते राति १ बजेको समयमा भक्तपुरको कमलविनायकमा पुस्कल रञ्जितकारले सञ्चालन गरेको मोबाइल पसलबाट मोबाइल चोरी भएको उजुरी परेको थियो ।

प्रहरी वृत्त जगाती भक्तपुरले निवेदनको आधारमा अनुसन्धान गर्दै जाँदा विभिन्न कम्पनीको २२ थान मोबाइल चोरी भएकोमा चोरी भएका मोबाइल मध्ये फागुन ८ गते विभिन्न कम्पनीका ८ थान मोबाइलसहित चोरी कार्यमा संलग्न जिनलाप घिसिङ पक्राउ परेका थिए ।

घटनाबारे थप अनुसन्धान कार्य भइरहेको भक्तपुर प्रहरीले जनाएको छ ।