१४ वर्षीय बालिकाको हत्या आरोपमा झारफुक गर्ने झाँक्री पक्राउ

काठमाडौं । बुटवलमा एक बालिकाको हत्या गरेको आरोपमा झाँक्री महिला पक्राउ परेकी छन्। झारफुक गर्ने बहानामा कुटपिट गरी बालिकाको हत्या गरेको आरोपमा प्रहरीले उनलाई पक्राउ गरेको हो ।

पक्राउ पर्नेमा सैनामैना नगरपालिका-१० बेमतेनी बस्ने २२ वर्षीय सोनिया रेश्मी रहेकी छन् । उनले झारफुक गर्ने बहानामा २० फागुनमा झिमझिमे बस्ने १४ वर्षीय सीता ज्ञवालीलाई कुटपिट गरेर हत्या गरेको प्रहरीले बताएको छ ।

कुटपिटबाट २० गते राति सीताको मृत्यु भएको र शवलाई राति नै दाहसंस्कार गरी सकिएको भन्ने सूचनाको आधारमा ईलाका प्रहरी कार्यालय सालझण्डीबाट खटिएको प्रहरी टोलीले रेश्मीलाई पक्राउ गरेको हो ।

उनीमाथि रुपन्देही जिल्ला अदालतबाट सात दिनको म्याद थप अनुमती लिई अनुसन्धान भइरहेको प्रहरीले जनाएको छ ।