राजधानीमा यात्रुबाट तोकिएभन्दा बढी भाडा असुल्ने पाँच जना पक्राउ

काठमाडौं । राजधानीमा यात्रुबाट तोकिएभन्दा बढी भाडा असुल्ने पाँच जना पक्राउ परेका छन् । आज शनिबार बिहान काठमाडौंको बल्खुबाट ट्राफिक प्रहरीले उनीहरूलाई पक्राउ गरेको हो ।

पक्राउ पर्नेमा सुविधा काउण्टरमा कार्यरत दुर्गा तामाङ, सुजन हुमागाईं, शिखरापुर काउण्टरमा काम गर्ने सुनिल नगरकोटी, गढीमाई सुमो सेवाबाट सञ्चालित सुमोका चालक ओजिर अन्सारी र लालिगुराँस काउण्टरबाट सञ्चालित सुमोका चालक कृष्णबहादुर योञ्जन हुन् ।

काठमाडौं उपत्यका ट्राफिक प्रहरी कार्यालयमा रहेको पीडित सहायता इकाइबाट सादा पोशाकमा खटिएका ट्राफिक प्रहरीले आज बिहान उनीहरुलाई नियन्त्रणमा लिएको हो ।

निर्धारण गरिएको भन्दाबढी असुल गरेको भाडा यात्रुलाई फिर्ता गरिएको र नियन्त्रणमा आएका पाँचै जनालाई आवश्यक कारबाहीका लागि प्रहरी वृत्त कालीमाटीमा बुझाइएको प्रहरीले जनाएको छ ।