१४ वर्षीय बालक हत्या आरोपमा दम्पती पक्राउ

काठमाडौं । मोरङमा एक बालकको हत्या आरोपमा दम्पती पक्राउ परेका छन् । सुनबर्सी नगरपालिका– १ मा डिल्लीबहादुर माझीको १४ वर्षीय छोरा विशाल माझीको हत्या आरोपमा उनीहरुलाई प्रहरीले नियन्त्रणमा लिएको हो ।

पक्राउ पर्नेमा छिमेकी ३५ वर्षीय वीरेन्द्र पासवान र उनकी श्रीमती ३४ वर्षीया डल्ली पासवान रहेका छन् ।

प्रहरीका अनुसार फागुन ११ गते बेलुकादेखि बालक बेपत्ता थिए। घरबाट खेल्न हिँडेका विशाल घर नफर्किएपछि खोजी गर्ने क्रममा फागुन १७ गते उनको शव घर नजिकैको पोखरीको डिलमा गाडेको अवस्थामा फेला परेको थियो ।

बालकको हत्यामा संलग्न भएको आरोपमा छिमेकी दुई जनालाई पक्राउ गरिएको प्रहरीले जनाएको छ । पक्राउ परेकाहरुमाथि ज्यान सम्बन्धी कसूरमा हिरासतमा राखेर अनुसन्धान गर्न अदालतबाट अनुमति लिइसकेको प्रहरीको भनाइ छ ।