ग्यास सिलिण्डर विस्फोट हुँदा आठ जना घाइते, चारको अवस्था गम्भीर

काठमाडौं । सुनसरीमा ग्यास चुहावट भएर आगलागी हुँदा आठ जना घाइते भएका छन् । धरान उपमहानगरपालिका-१७ स्थित सबिता राईको घरमा डेरा गरी बस्ने अञ्जना राईको कोठामा ग्यास चुहावट भएर विस्फोट हुँदा उनीहरु घाइते भएका हुन् ।

घाइते मध्य चार जनाको अवस्था गम्भीर रहेको प्रहरीले जनाएको छ । आज दिउँसो कोटामा कोसी ग्यासको सिलिण्डर लिक भएपछि मानिस बोलाएर मर्मत गर्ने क्रममा विस्फोट भएको प्रहरीले बताएको छ ।

घाइते हुनेहरूमा सबिता राई, अञ्जना राई, रामकुमारी राई, साङ्केन राई, सुमिहाङ राई,अनीश कार्की र वासुदेव खड्का हुन् । उनीहरुको उद्धार गरी अहिले बिपी कोइराला स्वास्थ्य विज्ञान प्रतिष्ठानको आकस्मिक कक्षमा उपचार भइरहेको प्रहरीले जनाएको छ ।