पूर्वमन्त्री श्रेष्ठको ८८ वर्षको उमेरमा निधन

काठमाडौं। पूर्वस्वास्थ्यमन्त्री प्राध्यापक डाक्टर मथुराप्रसाद श्रेष्ठको निधन भएको छ। श्रेष्ठको उपचारका क्रममा आज बिहान माइतीघरस्थित अन्नपूर्ण न्यूरो अस्पतालमा ८८ वर्षको उमेरमा निधन भएको हो ।

दम र छातीको सङ्क्रमण कारण श्रेष्ठको मृत्यु भएको बताइएको छ । मानवअधिकार क्षेत्रमा पनि काम गरिरहेका वामपन्थी बुद्धिजीवी श्रेष्ठले चिकित्सकले समुदायमै गएर उपचार गर्नुपर्छ भन्ने मान्यतालाई अघि बढाएका थिए ।

विसं २०४६ मा प्रजातन्त्रको पुनर्बाहाली भएपछि बनेको सरकारमा श्रेष्ठ नागरिक समाजका तर्फबाट स्वास्थ्यमन्त्री थिए ।

उनको मङ्गलबार पशुपति आर्यघाटमा दाह संस्कार गरिने पारिवारिक स्रोतले बताएको छ ।