कैलालीमा चितुवाको छालासहित दुई जना पक्राउ

काठमाडौं । कैलालीमा चितुवाको छालासहित दुई जना पक्राउ परेका छन् । अछामको पञ्चदेवल बिनायक नगरपालिका–६ का ३६ वर्षीय तुलबहादुर बिक‍ र जुम्लाको तातोपानी गाउँपालिका– ४ राउतवाडा का ५० वर्षीय तुलबहादुर खत्रीलाई प्रहरीले पक्राउ गरेको हो ।

जिल्ला प्रहरी कार्यालय कैलालीले उनीहरुलाई कुइनेबाट चिसापानीतर्फ जाँदै गर्दा चिुतवाको छालासहित से ५ प ८०३१ नम्बरको मोटरसाइकलसहित पक्राउ गरिएको जनाएको छ ।

प्रदेश प्रहरी कार्यालय र इलाका प्रहरी कार्यालय चिसापानीको टोलीले खत्रीसँग रहेको झोला चेक गर्दा लम्बाई ७ फिट १० ईन्च र चौडाई ४ फिट ७ ईन्च भएको चितुवाको छाला बरामद गरेको हो ।

उनीहरुको साथबाट बन्यजन्तुको विभिन्न भागका गरेर २ किलो ९५० ग्राम हड्डी समेत बरामद गरिएको प्रहरीले जनाएको छ । दुवै जनालाई नियन्त्रणमा राखेर प्रहरीले थप अनुसन्धान गरिहेको छ ।