काठमाडौँ । केहि महिनाअघि महोत्तरीको रामगोपालपुर घर भएका डा.पंकज चौधरीसँग प्रेम विवाह भएकी नेहा चौधरीलाई दाइजोको निहुँमा श्रीमान र परिवार पक्षले कुटपिट गरी घर निकाला गरेको आरोपमा डा. पंकज चौधरी पक्राउ परेका छन् ।
हिजो मंगलबार साँझ ३५ वर्षीय पंकजलाई पक्राउ गरेको प्रहरीले जानकारी दिएको छ । दाइजो नपुगेको भन्दै श्रीमतीलाई कुटपिट गरेको आरोपमा मुछिएका ती डाक्टरलाई ग्राण्डी र नर्भिक हस्पिटलले कामबाट समेत निकालेको थियो।
नेहाले दिएको उक्त दाईजोविरुद्धको जोहरी आधारमा उनलाई पक्राउ गरेको प्रहरीको भनाई छ।
यसअघि गत कार्तिक ४ गते नेहाले घरेलु हिंसा सम्बन्धि उजुरी जिल्ला प्रहरी कार्यालय महोत्तरीमा दर्ता गराएकी थिइन् । त्यस बखत पनि तीन दिन प्रहरीले पंकजलाई थुनेको थियो ।
दाइजोविरुद्धको कसुरमा कारबाही चलाउन पंकजमाथि अनुसन्धान गरिरहेको जिल्ला प्रहरी कार्यालय महोत्तरीले जनाएको छ । अहिले उनलाई जिल्ला प्रहरी कार्यालय महोत्तरीको हिरासतमा राखिएको छ ।
३ वर्षको प्रेम पश्चात गत फागुनमा परिवारकै सहमतिमा महोत्तरीकै औरही नगरपालिका १ की नेहा र डा पंकजबीच समाजिक परम्परा अनुसार विवाह भएको थियो । नगद र सुनचाँदी गरी १ करोड २५ लाख रुपैयाँ नेहारको परिवारले खर्च गरेका थिए ।
नेहा चौधरीले आफ्नो श्रीमानविरूद्ध २ वटा मुद्दा दायर गरेकी थिइन् । सो घटना सामाजिक संजालमा निकै सार्वजनिक भएपछि नेहा माथि भएको अत्याचारको चर्को विरोध भएको थियो।
