५ हजार ६२७ मतान्तरका साथ स्याङ्जा २ बाट धनराज गुरुङ बिजयी

स्याङ्जा । स्याङ्जा २ बाट प्रतिनिधिसभा सदस्यमा नेपाली कांग्रेसका उपसभापति धनराज गुरुङ ५ हजार ६२७ मतान्तरका साथ निर्वाचित भएका छन् । एमालेकी सचिव तथा पूर्वमन्त्री पदमाकुमारी अर्याललाई पराजित गर्दै गुरुङ निर्वाचित भएका हुन् । शनिबार राति स्याङ्जा २ को मतणना सकिएको छ ।

मतगणना अनुसार गुरुङले ३१ हजार ४६६ मत पाएर बिजयी भए भने उनका निकटतम प्रतिस्पर्धी एमालेकी अर्यालले २५ हजार ८३९ मत पाएकी छन् । 

स्याङ्जा २ मा राष्ट्रिय स्वतन्त्र पार्र्टीका उम्मेदवार टिकराज गुरुङले पनि उल्लेख्य मत पाएका छन् । उनले ८ हजार ११३ मत पाएका छन् । 

२०७४ मा स्याङ्जाबाट नेपाली कांग्रेसका गोपालमान श्रेष्ठलाई पराजीत गरी एमालेकी अर्याल बिजयी भएकी थिइन् । उनलाई केपी शर्मा ओलीले स्वास्थ्य राज्यमन्त्री, भूमिब्यवस्था मन्त्री र कृषि मन्त्री बनाएका थिए ।

तीन वटा मन्त्रालयमात्र होइन, एमालेका कयौं बरिष्ठ महिला नेतृहरुलाई पछि पार्दै एमाले अध्यक्ष ओलीले सौराहा महाधिवेशनबाट अर्याललाई पार्टीको सचिव समेत बनाए । उनी भूमिब्यवस्था मन्त्री हुँदा गिरीबन्धु टी स्टेटको हदबन्दीको जग्गा फुकुवा गर्न भूमि ऐन संशोधनदेखि सबै अनियमित प्रक्रियामा सामेल थिइन् । उनले धेरै ठाउँमा सरकारी जग्गा दर्ता गर्ने माफियादेखि कित्ताकाट खुलाउने क्रममा अपारदर्शी चलखेल गरेको आरोप लाग्यो ।

कृषि मन्त्री हुँदा नक्कली मल भित्र्याएर अरब घोटाला पनि उनकै कार्यकालमा भएको थियो । यिनै कारणले उनले अहिलेको चुनावमा पराजयको सामना गर्नुपरेको छ ।