इलाम २ मा पुनः मतदान गर्न माग, खसेको भन्दा धेरै मतपत्र भेटियो

काठमाडौं । नेकपा (एकीकृत समाजवादी) पार्टीका सम्मानित नेता झलनाथ खनाल उम्मेदवार रहेको इलाम २ मा एमालेले कांग्रेसलाई मिलाएर धाँधली गरेको रहस्य खुलेको छ । खसेको मत भन्दा बढी मतपत्र देखिएपछि नेकपा एकीकृत समाजवादीका उम्मेदवार खनालले मतगणना नै बहिस्कार गरेका छन् ।  

सूर्योदय नगरपालिका को हिमालय मावि मतदान केन्द्रका १ (क) र (ग) बुथ, सिंहदेवी मावि र सूर्योदय ३ को साविक वडा समितिको कार्यालय (ख), (ग) र (घ) मतदान केन्द्रमा खसेको भन्दा २ सय ६६ वटा बढी मतपत्र भेटिएको छ । यसअघि खसेको भन्दा थोरै मतपत्र भेटिएको इलाम २ मा शनिबार बिहान मतगणना गर्ने क्रममा बढी मतपत्र भेटिएको हो । 
युवासंघ नेपालका उपाध्यक्ष संजीव राईले भने–एमालेले बुथकब्जा गरेकाले खसेको मतपत्रभन्दा बढी मतपत्र भेटिएको हो । यदि बुथकब्जा नगरेको भए कसरी भेटिन्छ ? 

पूर्वप्रधानमन्त्री समेत रहेका खनालले मतगणनाको क्रममा खसेको मतभन्दा धेरै गणना भएकाले पुनः मतदान गर्नुपर्ने दावी गरेका छन् । इलाम २ मा उनले सुरुबाटै त्रुटि भएकाले पुनः मतगणना गर्न माग गरेका छन् । खनालले भने– खसेको भन्दा धेरै गणना कसरी हुन्छ ? कुनै ब्रम्हाले ल्याएर त त्यहाँ राखेनन् होला । यो धाँधलीकै जीउँदो प्रमाण हो ।