अबको भारतीय रणनीतिः संविधान संशोधन संसदबाट सर्वसम्मत हुन नदिने

काठमाडौं । राष्ट्रिय जनता पार्टी(राजपा) संविधान संशोधनको विपक्षमा उभिने भएको छ । देशको सीमा मिचिंदा पनि नदुख्ने र विदेशीले सीमा मिचेको ठीक हो भनेर मतदान गर्ने पार्टीका रुपमा राष्ट्रिय जनता पार्टी(राजपा) इतिहासमा कलंकित हुने भएको छ । महन्थ ठाकुर जस्ता प्रजातन्त्रका लागि लामो योगदान गरेका बयोबृद्ध नेता जीवनको अन्तिम घडीमा कलंकित हुने भएका छन् । राजपाले संविधान संशोधनको विपपक्षमा मतदान गर्ने पक्षमा पुगे पनि उक्त पार्टीसँग एकता गरेको समाजवादी पार्टीले भने संशोधनको पक्षमा मतदान गर्ने भएको छ ।

नेपालको संसदमा सत्तारु दल नेकपा, प्रमुख विपक्षी नेपाली कांग्रेस, तेस्रो पार्टीका रुपमा चिनिएको समाजवादी लगायतका राप्रपा, मसाल सबैले संविधान संशोधनको पक्षमा मतदान गर्ने भएका छन् । राष्ट्रियताको मामलामा संसदमा एकमतका साथ संविधान संशोधन गराउने पक्षमा प्रधानमन्त्री केपी शर्मा ओली छन् । उनले त्यसका लागि सर्वदलीय बैठकमा सबै पार्टीलाई अनुरोध पनि गरिसकेका छन् । तर भारतले नक्सा जारी हुनै नदिने, भइसकेपछि संसदबाट अनुमोदन हुन नदिनका लागि नेपाली कांग्रेसभित्र खेल्न खोज्यो । तर त्यसमा पनि असफल भइसकेपछि अब नेपालको संसदले एकमतका साथ संविधान संशोधन हुन नदिने खेलमा छ । त्यसका लागि राजपालाई उसले अगाडि सारेको छ ।

एकता नटुंगिंदै विभाजनतिर

पदीय भागबण्डालाई थाँती राखेर रातारात एकता प्रक्रिया सुरु गरेका समाजवादी पार्टी र राष्ट्रिय जनता पार्टी (राजपा) भित्र संविधान संशोधन प्रस्तावले पुनः विभाजनको रेखा कोरेको छ । समाजवादी पार्टीले सीमा जस्तो कुरामा संविधान संशोधन हुनलागेकाले त्यसमा समर्थन गर्ने मत राखेको छ । तर राजपाले संविधान संशोधनको विपक्षमा मतदान गर्ने भएको छ । यसरी एकता प्रक्रिया सार्थक नहुँदै दुवै पार्टीमा मनोमालिन्य बढेको छ । सरकारले लिम्पियाधुरा, लिपुलेक र कालापानी समेटेर जारी गरेको नक्सा समेटेर निशान छाप फेर्नका लागि संविधान संशोधन हुँदैछ । संविधान संशोधनका पक्षमा संसदभित्र सर्वसम्मत बनाउनका लागि प्रधानमन्त्री केपी शर्मा ओलीले जेठ १२ मा सर्वदलीय बैठक बोलाएका थिए । त्यो बैठकमा नेपाली कांग्रेसका सभापति शेरबहादुर देउवाले पार्टी केन्द्रीय समितिबाट निर्णय गराउनुपर्ने भएकाले केही दिन संविधान संशोधन संशोधनको प्रस्ताव संसदको कार्यसूचीमा राख्न अनुरोध गरेका थिए । कांग्रेसले शनिबार संविधान संशोधनको पक्षमा मतदान गर्नका लागि संसदीय दललाई निर्देश गर्ने निर्णय गरिसकेको छ । तर प्रस्तावित जनता समाजवादी पार्टी(तत्कालीन राजपा र समाजवादी)ले संविधान संशोधनको पक्ष वा विपक्षमा मत हाल्ने निर्णय गरेका छैनन् । राजपाका नेताहरुले संविधान संशोधनको विपक्षमा मत हाल्ने भएका छन् ।