संविधान संशोधनमा राष्ट्रिय सहमति जुटाउने प्रयासमा प्रधानमन्त्री ओली

काठमाडौं । प्रधानमन्त्री केपी शर्मा ओलीले देशको भौगोलिक अखण्डता, सीमा र राष्ट्रियताको विषयमा निशर्त राष्ट्रिय सहमति कायम गरेर अघि बढ्नुपर्नेमा जोड दिएका छन् । मंगलबार अपरा्हन प्रधानमन्त्री निवास बालुवाटारमा बोलाइएको सर्वदलीय बैठकमा उनले सबै दलका नेताहरुसँग राष्ट्रियताको बिषयमा राष्ट्रिय सहमति कायम गरेर जान आग्रह गरेका हुन् ।

बालुवाटारमा करिब ३ घन्टासम्म सर्वदलीय छलफल भएको थियो । वार्ता र कूटनीति नै यस समस्या समाधान गर्ने एकमात्र उपाय भएको कुरा पनि प्रधानमन्त्री ओलीले राखेका थिए । संविधान संशोधनका अन्य विषयहरूमा छलफल गर्दै जाने र निशान छापमा नक्सा परिवर्तनको विषयमा यसै अधिवेशनमा छिटो निर्णय गर्नुपर्ने आवश्यकताप्रति प्रधानमन्त्रीले सहभागी नेताहरुसँग बैठकमा विशेष अनुरोध गरेका थिए ।

बैठकमा नेपाली कांग्रेसका सभापति शेरबहादुर देउवाले संविधान राष्ट्रिय सहमति जुटाएर संविधान संशोधन गर्न आग्रह गरेका थिए । कांग्रेसको आग्रह अनुसार सरकारले सबै दलको सहमतिमा संविधान संशोधन गर्न सकारात्मक देखिएको समाचार छ ।

जनता समावादी दलका अध्यक्ष महन्थ ठाकुरले संविधान संशोधन गर्दा आफूहरुका माग पनि समेट्नुपर्ने धारणा राखेका थिए ।

लिम्पियाधुरा, लिपुलेक, कालापानी समेटिएको नक्सा सरकारले जेठ ७ मा जारी गरिसकेको छ । जसलाई संसदबाट अनुमोदन गर्नुपर्ने हुन्छ । दुई तिहाई बहुमत आवश्यक पर्ने र राष्ट्रियताको सवालमा सबै दल एकमत भएमा त्यसको सन्देश सकारात्मक जाने भएकाले पनि प्रधानमन्त्रीले सर्वदलीय बैठक बोलाएको बताइएको छ ।