सीमा मिचिंदा यी सेलिब्रेटी किन मौन ?

मदनकृष्ण श्रेष्ठ, हरिबंश आचार्य र भुवन केसी

काठमाडौं । भारतले नेपाली भूमि लिम्पियाधुरा, लिपुलेक र कालापानी मिचेर सडक बनाएको बिषयमा देशमा चौतर्फी बिरोध भएको छ । सबै पेशा र ब्यवसायमा स्थापित ब्यक्तिहरुले भारतले सीमा मिचेर सडक बनाएको बिषयमा बिरोध गरेका छन् । महानायक राजेश हमाल, कलाकार मनोज गजुरेल, सीताराम कट्टेल धुर्मु र दीपकराज गिरी लगायत धेरैले सीमा मिचिएकोमा बिरोध गरेका छन् ।

नेपाल सरकारले लिम्पियाधुरासहित समेटेर नक्सा जारी गरेको बिषयमा उनीहरुले गौरवबोध गर्दै स्वागत गरेका छन् । तर, जनआन्दोलन २०६२–०६३ मा आन्दोलनकारीको उपचारका लागि कोष खडा गर्नेदेखि भूकम्पमा परेकाहरुको उद्दार र राहतमा सक्रियतापूर्वक अगाडि देखिएका महजोडी (मदनकृष्ण श्रेष्ठ र हरिबंश आचार्य) सीमा मिचिंदा मौन देखिएका छन् । भारतले नेपाली भूमि लिम्पियाधुरा कालापानीमा मानसरोबर जाने सडक बनाएर उदघाटन गरेको १५ दिन बितिसक्दा पनि महजोडी अलप छन् । उनीहरुको मुखबाट सीमा मिचिएको बिषयमा एक शब्द कसैले सुनेका छैनन् । र, नेपाल सरकारले नक्सा जारी गरेको बिषयमा उनीहरुको धारणा पनि सुनिएको छैन ।

राजेश हमाल, दीपकराज गिरी र सीताराम कट्टेल ‘धुर्मुस’

महजोडी नेपाली कलाकारितामा सबैले आदर गर्ने पात्र हुन् । तर देशको सीमा मिचिंदा उनीहरुको मौनता रहस्यमय मानिएको छ । सदाबहार नायक भुवन केसी पनि सीमा मिचिंदा चुप छन् । अहिलेका चल्तीका नायिकाकाहरु प्रियंका कार्की, बर्षा राउत, झरना थापालगायतले पनि सीमा मिचिएको बारेमा एक शब्द पनि बोल्न आवश्यक ठानेका छैनन् ।

त्यस्तै डा. बाबुराम भट्टराईले खोलेको नयाँ शक्ति पार्टीमा नेता भएर पछिल्ला दिनमा गुमनाम भएकी नायिका करिस्मा मानन्धर पनि सीमा मिचिंदा चुपचाप छिन् । भारतीय चलचित्रमा काम गरी स्थापित भएकी मनीषा कोइरालाले सीमा मिचिएको बिषयमा परराष्ट्र मन्त्री प्रदीप ज्ञवालीको ट्वीटमा गरेको मेन्सनका कारण सारा भारतीय मिडिया उनका बिरुद्ध बिषबमन गरिरहेका छन् । तर नेपालका नायिकाहरु आफ्नै देशको सीमा मिचिंदा एक शब्द पनि बोल्न आवश्यक ठानिरहेका छैनन् । मनीषा कोइरालाले जुन देशभक्ति देखाइन्, त्यसले सारा नेपालीको मन जितेको छ । तर हाम्रा नायिकाहरु कहाँ छन् ? जुन देशले कलाकार भनेर सम्मान गरेको छ, त्यो देशप्रति उनीहरुको कुनै दायित्व हुँदैन ?

गायक राजेशपायल राई, कलाकार सन्तोष पन्त, गायक सत्यस्वरुप आचार्य लगायतका कलाकार पनि मौन छन् । नयाँपुस्ताका नायकहरु सौगात मल्ल, पल शाह, दयाहाङ राई, अनमोल केसी पनि आफ्नो देशको सीमा मिचिदा एक शब्द नबोली चुप छन् । कलाकार देशका गहना हुन् भन्ने गरिन्छ । तर राष्ट्रको सीमा मिचिंदा उनीहरु किन मौन छन् ?

त्यसो त, देशको सीमा मिचिंदा त्यसको सशक्त बिरोध गर्नेमा राजेश हमाल र मैदानमै उत्रिनेमा नायक नवल खड्का देखिएका छन् । त्यसो त नायक खड्का कलाकारितामा राष्ट्रियताको पक्षमा अभिनय गर्नेदेखि खरो धारणा राख्ने कलाकारका रुपमा चिनिंदैआएका छन् । उनी पूर्वमा टिष्टादेखि पश्चिममा काँगडासम्म नेपाली भूमि हो, त्यो फिर्ता हुनुपर्छ भन्ने अभियानमा पनि आवद्ध छन् ।

सीमा मिचिंदा विश्वको कुनाकाप्चाका नेपालीको मन दुखको छ । उनीहरुले सामाजिक संजालमा भारतीय हेपाहा नीतिको बिरोध गरेका छन् । तर नायक सरोज खनाल भने चुपचाप देखिएका छन् । लामो समय अमेरिकामा बसी केही बर्षअघि नेपाल फर्किएका सरोज खनाल कोरोना संक्रमणपछि पुनः उतै गएका छन् ।