‘महामारी नियन्त्रण गर्न सरकार चुकेको छ\’- देउवा

काठमाडौँ, ४ जेठ । प्रमुख प्रतिपक्षी दल नेपाली कांग्रेसका सभापति शेरबहादुर देउवाले लकडाउन गरेको ५५ दिनमा सरकारले कोरोना महामारी नियन्त्रण र रोकथाममा  केही काम नगरेको आरोप लगाएका छन । आइतबार प्रतिनिधि सभा बैठकमा नीति तथा कार्यक्रमको छलफलमा भाग लिँदै देउवाले भने, ‘खोई सरकारले कोरोना रोकथामको लागि गरेको काम ?’

सरकारले चैत ११ गतेदेखि लकडाउन सुरू गरेको थियो। पटकपटक थपिएको लकडाउनको अवधि भोलि सकिँदैछ।नेपालमा कोरोनाबाट अहिलेसम्म एक जनाको मृत्यु भएको छ भने दुई सय ९१ जनामा कोरोना पुष्टि भएको छ।यसबीचमा सरकारले पिसिआर प्रविधिबाट परीक्षणको दायरा वृद्धि गर्न नसकेको देउवाको भनाइ छ।‘हिजोसम्म २६ हजारमा पिसिआर प्रविधिबाट परीक्षण गरिएको सरकारी तथ्यांकले नै देखाउँछ,’ उनले भने, ‘कोरोना परीक्षणको दायरा बढाउनुपर्‍यो।’

सरकारले अत्यावश्यक स्वास्थ्य सामग्रीको व्यवस्थापन गर्न नसकेको पनि देउवाले आरोप लगाए।अग्रपंक्तिमा रहेर काम गरिरहेका स्वास्थ्यकर्मी, सुरक्षाकर्मी, सञ्चारकर्मी, सरसफाइकर्मीलगायत नै जोखिममा पर्नु दुस्खद भएको उनले बताए।‘महामारी नियन्त्रण गर्न सरकार चुकेको छ,’ उनले भने, ‘पहिलो संक्रमित व्यक्ति भेटिएको चार महिना हुन लाग्यो तैपनि तयारी केही गरेन।’  उनले स्वास्थ्य सामग्रीको उपलब्धताको प्रत्याभूति गर्न पनि सरकारसँग माग गरेका छन्।

‘अस्पतालहरूमा भेन्टिलेटरको व्यवस्था नहुनु दुस्खद छ,’ उनले भने, ‘सरकारले राहतको प्याकेज पनि ल्याउन सकेन।’