अदालतले घोक्र्याएर एमालेमा फर्काइ दियो : नेपाल

काठमाडौं । नेपाल कम्युनिष्ट  पार्टी (एमाले) का  नेता माधवकुमार नेपालले सर्वोच्च अदालतले आफूलाई घोक्र्याएर केपी शर्मा ओलीकै पार्टीमा फर्काइएको टिप्पणी गरेका छन् ।

आज  बृहत् नागरिक आन्दोलनद्वारा  काठमाडौंमा आयोजित समसामयिक विषयको अन्तरक्रियामा सर्वोच्च अदालतको फागुन २३ गतेको फैसलालाई संकेत गर्दै नेता नेपालले आफूलाई प्रतिगमनकारी केपी ओलीकै पार्टीमा जान बाध्य पारिएको र त्यहाँ बस्न अप्ठेरो लागिरहेको बताए ।

उनले भने–‘दुःखका साथ भन्नुपर्छ अहिलेका हाम्रो पार्टीका अध्यक्ष केपी शर्मा ओलीबाट जुन प्रतिगमनकारी कदम चालियो त्यसको विरुद्धमा तपाईहरु संघर्षको मैदानमा हुनुहुन्थ्यो । आज म अप्ठेरो महसुस गर्दैछु, त्यही पार्टीमा मलाई फेरि सार्वोच्च अदालतले घोक्र्याएर पठाइदिएको छ । सर्वोच्च अदालतले विचित्रको फैसला गरेको छ ।’

‘हामी पुरानो ठाउँमा फर्किन खोजिरहेका छौं । तर बिडम्बना भन्न पनि कस्तो गाह्रो छ भन्दा यो पार्टी भित्रको कुरा फेरि डबलीमा आएर भन्यो माधव नेपालले भनेर फेरि अर्को आरोप लाग्ला । त्यसपछि कुन दिन मलाई घोक्र्याएर त्यहाँबाट पनि निकाल्दिने स्थिति बन्ला । त्यस्ता कुराबाट डराउनेवाला माधाव नेपाल होइन ।’ नेपालले थप भने ।

डबलीमा रहेका जसपाका नेता महन्थ ठाकुर र कांग्रेस नेता मिनेन्द्र रिजाललाई इंगित गर्दै उनले भने–‘महन्थजीको र मिनेन्द्रजीको दया कृपा रहेसम्म यो सरकार रहिरहन्छ ।’