लथालिङ्ग हुँदै एमाले, अझै मिलेन सहमति, बालुवाटार र कलंकीमा छुट्टाछुट्टै बैठक

काठमाडौँ। सत्तारूढ नेपाल कम्युनिष्ट पार्टी (नेकपा) एमालेका दुई पक्षले आज छुट्टाछुट्टै बैठक गर्दैछन्। 

आज पार्टी अध्यक्ष एवं प्रधानमन्त्री केपी शर्मा ओली नेतृत्वको बैठक दिउँसो ३ बजे प्रधानमन्त्री निवास बालुवाटारमा र सत्ता पक्षसँग असन्तुष्ट रहेको झलनाथ खनाल र माधवकुमार नेपाल पक्षले बिहान ११ बजे कलंकीस्थित एक पार्टी प्यालेसमा केन्द्रीय समितिको बैठक बस्न लागेको छ ।

गत फागुन २३ गते सर्वोच्च अदालतले नेकपा बदर गरेर पार्टीलाई पहिलेकै अबस्थामा  ब्युताइदिएपछि एमालेमा अहिले आन्तरिक द्वन्द चलिरहेको छ। 

वर्तमान समयमा पार्टीभित्र रहेका अध्यक्ष ओली र शीर्षनेताहरुको मन नमिल्दा  एमाले लथालिङ्ग भएको छ।  

यसैबीच, कलंकीस्थित नेपाल पक्षको आजको बैठकले पार्टी विधानअनुसार पार्टीका बैठकहरु बोलाउन अध्यक्ष ओलीलाई अनुरोध गर्ने निर्णय गर्ने स्रोतले बताएको छ भने अध्यक्ष ओलीले बालुवाटारमा नेपाल पक्षका नेताहरुले बुझाएको स्पष्टीकरण जवाफको बारेमा निर्णय गर्ने एमाले संसदीय दलका प्रमुख सचेतक बिशाल भट्टराईले बताएका छन्। 

यसअघि बालुवाटारमा बसेको बैठकले पार्टीको बिधान विपरित गुट भेला गरेको भन्दै असन्तुष्ट रहेका नेपाल पक्षका चार जनालाई स्पष्टीकरण पत्र पठाएको थियो भने बिहीबार उक्त पत्रको जवाफसहित नेताहरुले पत्र बुझाएका छन्। 

अध्यक्ष ओलीले एकलौटी निर्णय गरेको र पार्टीको बिधान विपरित कार्यहरु गर्दै आइरहेको भन्दै नेपाल पक्षले असहमति जनाउदै आएको छ।