एमालेमा रोकिएन समानान्तर गतिविधि: ओलीले संसदीय दलको बैठक बोलाए, खनाल-नेपालको भेला सोही दिन !

नेकपा एमालेभित्र समानान्तर गतिविधिको अभ्यास गरिरहेका वरिष्ठ नेता झलनाथ खनाल तथा माधवकुमार नेपाल पक्षले शुक्रवारका लागि केन्द्रीय कमिटी सदस्यको भेला बोलाएका छन् ।

शुक्रवारकै लागि प्रधानमन्त्री एवं एमाले संसदीय दलका नेता केपी शर्मा ओलीले संसदीय दलको बैठक पनि बेलाएका छन् ।

राष्ट्रिय सभामा एमाले संसदीय दलका प्रमुख सचेतक खिमलाल भट्टराईले शुक्रवार दिउँसो ३ बजेका लागि प्रधानमन्त्री ओलीले संसदीय दलको बैठक बोलाएको जानकारी दिए । 

यसअघि पनि खनाल-नेपाल पक्षको राष्ट्रिय कार्यकर्ता भेला भएकै दिन एमाले संसदीय दलको बैठक बसेको थियो ।

संसदीय दलका लागि स्पष्ट एजेण्डा तोकिएको छैन । 

चैत ७ गते बसेको संसदीय दलको बैठकले संसदीय दलको विधान संशोधन गर्दै संसदीय बोर्ड गठन गरेको थियो ।

सोही दिन बसेको केन्द्रीय कमिटी बैठकले पार्टीमा समानान्तर गतिविधि गरेको भन्दै माधव नेपाल, भीम रावल, घनश्याम भुसाल र सुरेन्द्र पाण्डेसँग स्पष्टीकरण सोध्ने निर्णय गरेको थियो । 

शनिवार बालुवाटारमा बसेको संसदीय दलको बैठक बहिस्कार गरेको खनाल–नेपाल समूह शुक्रवारको बैठकमा सहभागी हुने/नहुने यकिन भएको छैन ।

शनिवार बालुवाटारमा संसदीय दलको बैठक बसिरहेको समयमा खनाल–नेपाल पक्षका ३८ जना सांसदले बैठक सिंहदरबार राख्नुपर्ने लगायत माग राख्दै ओलीलाई पत्र पठाएका थिए ।

संसदीय दलको बैठकलाई सम्बोधन गर्दै ओलीले गुटसँग सौदाबाजी नगर्ने र व्यक्तिगत रूपमा सांसदहरूसँग डिल गर्ने बताएका थिए ।

शनिवारको बैठकमा यसअघि माधव नेपाल पक्षमा रहेका सांसद कृष्णभक्त पोखरेल संस्थापन पक्षमा फर्किएका थिए ।

संसदीय दलको बैठकमा अनुपस्थित भएका सांसदलाई स्पष्टीकरण सोध्नेलगायत विषयमा छलफल हुने एक सदस्यले जानकारी दिए । 

दलीय अनुशासन उल्लंघन गर्ने सांसदलाई स्पष्टीकरण सोध्नका लागि एमालेले ओलीको संयोजकत्वमा २४ सदस्यीय संसदीय बोर्ड गठन गरेको थियो । 

‘संसदीय दलको बैठकमा उपस्थित नहुने, तर गुटको भेलामा सहभागी सांसदहरूलाई स्पष्टीकरण सोध्ने विषयमा शुक्रवारको बैठकका छलफल हुन्छ,’ ती सांसदले लोकान्तरसँग भने ।

केन्द्रीय कमिटीले ४ जना नेतासँग स्पष्टीकरण सोधे पनि सांसदहरूसँग स्पष्टीकरण सोधिएको छैन ।

बोर्डका सदस्य सांसद शेरबहादुर तामाङले अहिलेसम्म बोर्डको बैठक बस्न नसकेको जानकारी दिए । बोर्डमा माधव नेपाल र झलनाथ खनाललाई पनि सदस्य बनाइएको छ ।  

संसदीय दलको विधान संशोधन गर्दै अध्यक्ष ओलीलाई समानुपातिक सांसदको सूची सच्याउन सक्ने अधिकार दिइएको छ । 

स्पष्टीकरण सोधिएका नेपाल पक्षका चार नेताले बिहीवार अबेरसम्म या शुक्रवारसम्म स्पष्टीकरण पत्रको जवाफ दिने तयारी गरेका छन् । 

रणनीति बनाउन माधव पक्षको बैठक

खनाल–नेपाल पक्षले भावी रणनीति बनाउन भन्दै शुक्रवार काठमाडौंमा उपलब्ध केन्द्रीय सदस्यहरूको भेला बोलाएको छ । 

‘समानान्तर गतिविधिलाई जिल्ला तहसम्म कसरी लैजाने भन्ने विषयमा छलफल गर्न भेला बोलाइएको हो,’ नेपालपक्षीय एक केन्द्रीय सदस्यले लोकान्तरसँग भने ।

खनाल–नेपाल पक्षले युवा र विद्यार्थी संगठनको राष्ट्रिय भेला गरी समानान्तर कमिटी गठन गरिसकेको छ ।

युवा संघको अध्यक्षमा नरेश शाही र विद्यार्थी संगठनको अध्यक्षमा सुदेश पराजुलीलाई जिम्मेवारी पनि दिएको छ ।

विद्यार्थी संगठनको भेलामा नेता नेपालले जिल्ला जिल्लासम्म प्रशिक्षण र भेला गर्ने बताएका थिए । 

‘हामीले राखेका विषय सम्बोधन नभई संसदीय दलको बैठकमा सहभागी हुने कुरै छैन । ७ गते शनिवारको बैठकमा हामीले विरोध पत्र बुझाएका छौं,’ नेपालपक्षीय ती नेताले भने । 

सांसदहरू सोमप्रसाद पाण्डे, जीवनराम श्रेष्ठ र यज्ञराज सुनुवारले शनिवार संसदीय दलको बैठक चलिरहेको समयमा ३८ सांसदको हस्ताक्षरसहित विरोध पत्र बुझाएका थिए ।