सशस्त्रमा आईजीपी बन्ने होड, प्रधानमन्त्री वालेन्द्रका ससुरा प्रयोग गर्दै एआईजी दाहाल

काठमाडौं । सशस्त्र प्रहरी बलका महानिरीक्षक राजु अर्याल यही बैशाख १८ गतेबाट अवकाशमा जाँदैछन् । अर्यालको अवकाशपछि बरिष्ठताका आधारमा एआईजी नारायणदत्त पौडेल सशस्त्रको महानिरीक्षक(आईजीपी) का दाबेदार हुन् ।

दोस्रो वरियताका एआईजी बंशी दाहाल पनि आईजीपी हुने दौडमा शक्तिकेन्द्र धाइरहेका छन् । आईजीपी हुने महत्वकांक्षा राखेका दाहाल राष्ट्रिय स्वतन्त्र पार्टीका बरिष्ठ नेता वालेन्द्र शाह प्रधानमन्त्री भएपछि उनका ससुरा झलकबहादुर काफ्लेलाई भेट्न २ पटक पुगिसकेको स्रोतको दाबी छ ।

स्रोतका अनुसार सशस्त्र प्रहरीका बाहिनी र गणहरुको निरीक्षणका क्रममा मधेश प्रदेश हुँदै उनी कोशी प्रदेशमा जाने क्रममा मोरङको उर्लाबारीमा रहेको वालेन्द्रका ससुरालाई भेट्न पुगेका थिए ।

प्रधानमन्त्री शाहको ससुराली उर्लाबारी हो । उनका ससुरा झलकबहादुर काफ्ले सशस्त्र प्रहरी बलका अवकाशप्राप्त डीएसपी हुन् । उनी नेपाल प्रहरीमा सेवा प्रवेश गरी सशस्त्र प्रहरी गठनपछि एक तह बढुवा हुँदै सशस्त्रमा गएका थिए ।

आईजीपीको प्रतिस्पर्धामा पहिलो वरियतामा रहेका एआईजी पौडेल दाहालभन्दा ५ महिना १३ दिन पहिले बढुवा भएका हुन् । उनलाई गौरीबहादुर कार्की नेतृत्वको जेनजी आन्दोलन जाँचबुझ आयोगले कारबाही सिफारिस गरेकाले आइजीपी हुने मौका आउने दाहालको झिनो आशा रहेकाले उनी लागिपरेको चर्चा छ । तर कार्की आयोगले नेपाल प्रहरीका दानबहादुर कार्कीलाई कारबाहीको सिफारिस गरेतापनि उनी आईजीपी भएकाले पौडेललाई यहीमात्र बहानामा आईजीपीबाट रोक्न सक्ने देखिंदैन ।

यद्यपि प्रधानमन्त्री शाहले ससुराली वा आफन्तको सिफारिस भन्दा पनि ऐन कानुन अनुसार नै निर्णय गर्ने भएकाले उनको प्रयास सार्थक हुने संभावना क्षीण रहेको स्रोत बताउँछ ।

केपी शर्मा ओली प्रधानमन्त्री भएको समयमा २०७५ जेठमा सशस्त्रमा एआईजीका दरबन्दी कटौती गरी २ वटामात्र बनाएका थिए भने नेपाल प्रहरीमा ३ जना कायम गरिएको थियो । तर २०७८ असार २८ मा परमादेशबाट गठन भएको शेरबहादुर देउवा नेतृत्त्वको सरकारका पालामा एआईजीको १ दरबन्दी थप गराई दाहाल बढुवा भएका थिए ।

२१ भदौ, २०७९ को मन्त्रिपरिषद् बैठकबाट सशस्त्र प्रहरीमा एउटा एआईजी थप गरी असोज, २०७९ मा उनी बढुवा भएका थिए । तत्कालीन प्रधानमन्त्री शेरबहादुर देउवापत्नी डा. आरजु राणालाई खुसी पारी दरबन्दी थप गराएको आरोप पनि दाहालमाथि लागेको थियो ।