सर्लाहीबाट तस्करी भएको ठूलो परिमाणको चिनियाँ सामान भारतमा बरामद, सीमामा प्रहरी सेटिङको आरोप

सर्लाही । सर्लाहीका विभिन्न सीमा नाकाबाट भारततर्फ तस्करी गरी पठाइएको चिनियाँ सामान भारतीय सुरक्षाकर्मीले नियन्त्रणमा लिएका छन् । सखुअवा र संग्रामपुर नाका प्रयोग गरी भारत पुर्याइएको चिनियाँ लसुन र काँक्रोको बियाँ भारतीय सशस्त्र सीमा बल (एसएसबी) को टोलीले बरामद गरेको हो ।

शुक्रबार भारतको सीतामढी जिल्लाअन्तर्गत लालबन्दी नाकामा खटिएको एसएसबी टोलीले दुई वटा महिन्द्रा बोलेरो पिकअपबाट ठूलो परिमाणमा सामान बरामद गरेको जनाएको छ । बरामद गरिएको चिनियाँ लसुन ६७ पोका अर्थात् करिब १ हजार २०६ किलोग्राम रहेको छ भने काँक्रोको बियाँ(बिउ) ३ हजार ७२४ किलोग्राम फेलापरेको छ ।

तस्करीमा संलग्न दुई जना व्यक्ति र गाडीसमेत नियन्त्रणमा लिई थप कारबाहीका लागि सोनबरसा भन्सार कार्यालय, सीतामढीमा बुझाइएको भारतीय पक्षले जनाएको छ ।

मधेश प्रदेश प्रहरी प्रमुखसँग सम्बन्धित घुमुवाको अडियो सार्वजनिक भइरहेका बेला बाहिर आएको यस घटनाले सर्लाही नाका हुँदै हुने तस्करी अझै सक्रिय रहेको संकेत गरेको छ ।

यसैबीच, जिल्लामा तस्करी नियन्त्रणका लागि कडाइ गरिएको दाबी भइरहेका बेला प्रहरीकै मिलेमतोमा तस्करी भइरहेको गम्भीर आरोप पनि सार्वजनिक भएको छ । स्रोतका अनुसार जिल्ला प्रहरी कार्यालय सर्लाहीबाट ‘क्राइम टोली’ का नाममा खटिएका प्रहरी जवान अजय सहनी र प्रहरी हवल्दार धर्मेन्द्र पटेल तस्करी सेटिङमा सक्रिय रहेको बताइएको छ ।

स्रोतले दिएको जानकारीअनुसार जिल्लाको पूर्वी नाकामा केही कमी देखिए पनि पश्चिमी क्षेत्रका बहादुरपुर, अर्नाहा, मधुवनी, बलरा लगायतका नाकाबाट अहिले पनि खुलेआम तस्करी भइरहेको दाबी गरिएको छ । नेपाल प्रहरी र सशस्त्र प्रहरीकै सेटिङमा अवैध ओसारपसार भइरहेको आरोप स्थानीय स्रोतले लगाएको छ ।

ठूलो परिमाणमा तस्करीको सामान भारतमै बरामद हुनु र यससँगै प्रहरी संलग्नताको आरोप बाहिरिनुले सर्लाही जिल्लामा तस्करी नियन्त्रणप्रति गम्भीर प्रश्न उठाएको छ ।