गलत सूचना सम्प्रेषणप्रति खनाल सचिवालयकाे गम्भीर ध्यानाकर्षण

काठमाडौं- खनाल सचिवालयले पूर्वप्रधानमन्त्री तथा नेपाल कम्युनिस्ट (एमाले) पार्टीका वरिष्ठ नेता झलनाथ खनालको स्वास्थ्य विषयमा आएका समाचारमा गम्भीर ध्यानाकर्षण भएको जनाएको छ ।

खनालको स्वास्थ्य अवस्थामा कतिपय सञ्चारमाध्यम, पत्रकार तथा सामाजिक सञ्जाल प्रयोगकर्ताले गलत र भ्रमपूर्ण समाचार सामग्री सम्प्रेषण गरेकोमा गम्भीर ध्यानाकर्षण भएको जनाएको हो ।

पूर्वप्रधानमन्त्री  झलनाथ खनालको विगत केही समय अगाडिबाट स्वास्थ्यमा सामान्य मात्र समस्या देखा परेको भएता पनि बाहिर मिडियामा आएको जस्तो जटिल र संवेदनशील अवस्था नभएकाे  सचिवालले जानकारी दिएकाे छ ।

कुनै पनि व्यक्तिको स्वतन्त्रतासम्बन्धी हकअन्तर्गत स्वास्थ्य जस्तो गम्भीर संवेदनशील कुराहरुमा सूचना  सम्प्रेषण गर्नु भन्दाअगाडि परिवारसँग जानकारी लिने वा सम्बन्धित पक्षसँग सत्यतथ्य बुझेर मात्र सूचना  सम्प्रेषण गर्न सुझाब दिदै, यस्ता खालका भ्रामक अफवाहमा आधारित समाचारहरु सम्प्रेषण गर्ने र प्रचार गर्ने  कामप्रति सचिवालयले गम्भीर आपत्ति व्यक्त गरिएकाे हाे ।

अहिले खनालको स्वास्थ्य अवस्था सामान्य रहेको र पार्टी कमिटीका सम्पूर्ण कार्यक्रमहरुमा सक्रियताका साथ लागिरहनु भएको छ भन्दै बाहिर आएको गलत सूचना को भ्रममा नपर्न सचिवालयले आमनागरिक, सञ्चार जगत, प्रबुद्ध समुदाय, शुभेच्छुक र शुभचिन्तकहरुमा सबैमा  आग्रह गरेकाे छ ।