लोकतन्त्र आएपछि धेरै विकास भएको छ: मदनकृष्ण श्रेष्ठ

काठमाडौँ । वरिष्ठ कलाकार मदनकृष्ण श्रेष्ठले लोकतन्त्र आइसकेपछि देशमा धेरै विकास भएको दाबी गरेका छन्।

महानगर यातायात प्रा।लि।को विद्युतीय बस सेवा सञ्चालन कार्यक्रमलाई बुधवार सम्बोधन गर्दै उनले यस्तो बताएका हुन्। उनले नेपाल अब विद्युतीय बस चढ्ने युगमा आइसकेको बताए। सडकहरू गाउँगाउँमा पुगेको र बिजुली बत्ती पनि गाउँगाउँमा पुगेको अवस्था रहेको बताए।

नेपालले पेट्रोल डिजेलमा अर्बौं रुपैयाँ खर्च गरिसकेको भन्दै विद्युतबाट चल्ने बसहरू सञ्चालन गर्नु राम्रो भएको बताए।

श्रेष्ठले भने, ‘हाम्रो देश पनि अब इभी मोटर चढ्ने युगमा आइसकेको छ। बाटोघाटो गाउँगाउँमा पुगेको छ। बिजुली गाउँ गाउँमा पुगेको छ। अब आफ्नै फ्युल करेन्टबाट चढ्ने बेला आएको छ। लोकतन्त्र आएपछि धेरै विकास मैले देखेको छु।’

वरिष्ठ कलाकार श्रेष्ठले जोमसोममा मोटर जाला भन्ने आफूले कल्पनै नगरे पनि पछिल्लो समय मोटरबाटै जोमसोम पुगेर आएको बताए।