आकस्मिक छलफलमा जुट्यो विद्यालय कर्मचारी परिषद्

काठमाडौं । सरकार र शिक्षक महासङ्घबिच भएको पछिल्लो सहमतिपछि असन्तुष्टि जनाउँदै विद्यालय कर्मचारी परिषद् आकस्मिक छलफलमा जुटेको छ।

बिहीबार रत्नराज्य माध्यमिक विद्यालयमा आयोजित कार्यक्रममा परिषद्का सदस्यहरूले उक्त सहमति अस्वीकार गर्दै कडा आपत्ति जनाएका छन् । उनीहरूले सरकार र शिक्षक महासङ्घबिचको सहमतिमा आफूहरूको मागलाई बेवास्ता गरिएको आरोप लगाएका छन् ।

विरोध प्रदर्शनपछि परिषद्का पदाधिकारी र सदस्यहरू अहिले पनि रत्नराज्य माध्यमिक विद्यालयमै छलफलमा छन् । परिषद्का अनुसार आफ्ना प्रमुख मागहरू अझै सम्बोधन नभएकाले आन्दोलन जारी रहने छ ।

सरकारले आफ्नो प्रतिनिधित्व नगरी निर्णय गरेको र यसले विद्यालय कर्मचारीको अधिकारमाथि कुठाराघात गरेको परिषद्को भनाइ रहेको छ । विद्यालय कर्मचारी परिषद्ले आगामी दिनमा थप आन्दोलनका कार्यक्रम सार्वजनिक गर्ने तयारी गरेको छ ।