भट्टको योग्यता नपुग्ने रिटमा आज सुनुवाइ हुँदै, गभर्नर नियुक्तिको अन्योल कायमै

काठमाडौं । नेपाल राष्ट्र बैंकको गभर्नर नियुक्तिका लागि कार्यकारी निर्देशकबाट राजीनामा दिएका डा. गुणाकर भट्टको योग्यता नपुग्ने भन्दै सर्वोच्च अदालतमा दायर रिट निवेदनमा आज आइतबार सुनुवाइ हुँदैछ ।
अधिवक्ताद्वय प्रतिभा उप्रेती र विशाल थापाको तर्फबाट शुक्रबार सर्वोच्चमा दायर पूरक निवेदनमा आइतबार सुनुवाइ हुन लागेको हो ।

६५ वर्षभन्दा माथिको व्यक्तिलाई गभर्नर नियुक्त गर्न नमिल्ने भन्दै उनीहरूले यसअघि नै दायर गरेको रिट सर्वोच्चमा विचाराधीन छ । अल्पकालीन अन्तरिम आदेश जारी भएको रिटका सम्बन्धमा आइतबार दुवै पक्षलाई बोलाएर सुनुवाइ हुँदैछ ।

त्यसैक्रममा सुनुवाइ गर्ने गरी पूरक निवेदनको पनि पेसी तोकिएको हो । गभर्नर बन्नका लागि कार्यकारी निर्देशक भट्टको योग्यता नपुग्ने भएकाले नियुक्ति रोक्न निवेदनमा माग गरिएको छ ।

यसअघि सर्वोच्चका न्यायाधीश नित्यानन्द पाण्डेको इजलासले ६५ वर्षमाथिको व्यक्तिलाई गभर्नर नबनाउन अल्पकालीन अन्तरिम आदेश जारी गरेको थियो ।

गभर्नर नियुक्तिमा कांग्रेस–एमालेबीच भट्टको नाममा सहमति भएलगत्तै उनले राष्ट्रबैंकको कार्यकारी निर्देशकबाट राजीनामा दिएका थिए । तर उनले दिएको राजीनामा निमित्त गभर्नर निलम ढुंगाना तिम्सिनाले स्वीकृत गरेकी छैनन् ।

गभर्नरको आकांक्षी डेपुटी गभर्नर ढुंगाना उनको राजीनामा स्वीकृत नगर्ने भन्दैआएकी छन् । एकातिर ढुंगानाले भट्टको राजीनामा स्वीकृत नगरेको र अर्कोतिर उनका बिरुद्ध सर्वोच्चमा योग्यता नपुगेको रिट परेकाले गभर्नर नियुक्ति अन्योलमा परेको छ ।