नेपाल प्रहरी अस्पताल र न्याम्सबीच एमडी-एमएस पढाइ सुरु गर्नेबारे सम्झौता

काठमाडौँ । महाराजगञ्जस्थित नेपाल प्रहरी अस्पतालमा पनि अब एमडी-एमएस अध्यापन हुने भएको छ । चिकित्सा विज्ञान राष्ट्रिय प्रतिष्ठान (न्याम्स)ले प्रहरी अस्पतालमा एमडी-एमएस कार्यक्रम सञ्चालन गर्न लागेको हो ।

मंगलबार स्वास्थ्य तथा जनसंख्या मन्त्री प्रदीप पौडेलको उपस्थितिमा नेपाल प्रहरी अस्पताल र न्याम्सबीच सम्झौता भएको छ । नेपाल प्रहरी अस्पतालका तर्फबाट मेडिकल डाइरेक्टर सुन्दरप्रसाद होजु र न्याम्सका तर्फबाट शिक्षाध्यक्ष डा. लोचन कार्कीले सम्झौता पत्रमा हस्ताक्षर गरेका छन् ।

न्याम्सका उपकुलपति प्रा‍. डा. भूपेन्द्रकुमार बस्नेत र नेपाल प्रहरीका तर्फबाट प्रहरी महानिरीक्षक वसन्तबहादुर कुँवरले संरक्षकका रूपमा हस्ताक्षर गरेका छन् ।

अहिले प्रारम्भिक सम्झौता भएको न्याम्सका उपकुलपति डा। बस्नेतले बताए । सम्झौतापछि अब प्रहरी अस्पतालमा कुन विषय कति सिट सञ्चालन गर्न सकिन्छ भनेर अध्ययन गरिने उनले जानकारी दिए ।