डब्लुएचओले निःशुल्क दिने ३५ थरी औषधि नेपाल आइपुग्दै

काठमाडौँ – नेपालले निः शुल्क पाउने भनिएको बाल क्यान्सरको उपचारमा प्रयोग हुने औषधि छिट्टै आइपुग्ने भएको छ। अमेरिकाको सेन्ट ज्यूड चिल्ड्रेन रिसर्च हस्पिटलको सहकार्यमा विश्व स्वास्थ्य संगठन (डब्लुएचओ)ले नेपाललाई ३५ थरीको औषधि निःशुल्क दिन लागेको हो।

बाल क्यान्सरको उपचारमा प्रयोग हुने ३५ प्रकारका अत्यावश्यक औषधि उपलब्ध गराउने सम्झौता अघिल्लो वर्ष २७, मार्चमा भएको थियो। सम्झौता अनुसार नेपालले ५ वर्षसम्मका लागि निःशुल्क औषधि प्राप्त गर्नेछ।

अहिले पहिलो लटमा एक वर्षलाई पुग्ने गरी औषधि आउन लागेको विश्व स्वास्थ्य संगठन नेपालका बाल क्यान्सर अधिकृत डा. सुमन पन्थीले जानकारी दिएका छन्। कुन दिन औषधि आइपुग्छ भन्ने निश्चित नभए पनि एकसाता भित्र आइपुग्ने उनले बताए।

यसरी निःशुल्क आउने औषधि तत्कालका लागि नेपालका ४ अस्पताललाई दिइने छ। भक्तपुर क्यान्सर अस्पताल, कान्ति बाल अस्पताल, पाटन अस्पताल र भरतपुरस्थित बीपी कोइराला क्यान्सर अस्पतालले औषधि पाउनेछन्। २०२५ देखि २०३० सम्म ५ वर्षका लागि नेपालले निःशुल्क औषधि पाउने सम्झौता भएको छ।