रौनियारको गोदामबाट १८ लाखका मोवाइल बरामद, सशस्त्र र प्रहरीको सेटिङमा तस्करी

बर्दघाट । तराईका सीमा सीमाक्षेत्रबाट तस्करी बढिरहेको छ । सीमा सुरक्षाका लागि राखिएका सशस्त्र प्रहरीका गुल्म, बीओपी र नेपाल प्रहरीका सीमा चौकीका इन्चार्जदेखि गणपति र प्रहरीका जिल्लाका प्रमुखसम्मको मिलेमतोमा तस्करी हुँदैआएको छ । गुल्म र सीमा प्रहरीचौकीमात्र होइन, जिल्ला र गणका अतिरिक्त बाहिनी र प्रदेश कार्यालयसमेतको संरक्षणमा तस्करी मौलाउँदा देशको राजस्व असुलीमा भने असर परिरहेको छ ।

यसैक्रममा सशस्त्र प्रहरी बल २६ नम्बर गण, पश्चिम नवलपरासीले बर्दघाटको एक गोदामबाट शनिबार १८ लाख बराबरका मोवाइल बरामद गरेको छ । सशस्त्र प्रहरीको टोलीले ब्यापारी बालमुकुन्द रौनियाको गोदामबाट उक्त मोवाइल बरामद गरेको हो ।

ब्यापारी रौनियारले बर्षौंदेखि पश्चिम नवलपरासीका महेशपुर र रामनगर नाकाबाट मोवाइल भन्सारछली तस्करी गरी भित्र्याउँदैआएका छन् । उनले भारतबाट तस्करीका मोवाइल सशस्त्र प्रहरी बल महेशपुर गुल्म र सीमा प्रहरी चौकी महेशपुरमा सेटिङ गरी तस्करी गरी बर्दघाटस्थित गोदाममा पुर्यायने गरेका छन् । बर्दघाटबाट उनले पोखरा, काठमाडांैं लगायतका देशका अन्य सहरमा पठाउने गरेको सूचना सशस्त्र प्रहरी मुख्यालयमा पुग्यो । सशस्त्र प्रहरी बलका आईजीपीकै सचिवालयबाट सशस्त्रको २६ नम्बर गणका एसपी प्रकाश वाग्लेलाई बर्दघाटको मोवाइल गोदाममा छापा हान्न निर्देशन दिएको थियो ।

आईजीपी सचिवालयले २० लाख बराबरको मोवाइल गोदाममा रहेको सूचना पाएकाले एसपी वाग्लेले बाध्य भएर छापा हानेका थिए । लुकायो, भेटिएन भन्न नपाउने कडा निर्देशनपछि एसपी वाग्लेले छापा हानेका थिए । छापा हान्दा करिब १८ लाख बराबरका तस्करीका मोवाइल बरामद भएका छन् ।

रौनियार पश्चिम नवलपरासीका महेशपुर र रामनगरबाट मोवाइल तस्करीका बादशाह नै मानिन्छन् । महेशपुरबाटै मोवाइल भित्र्याउने गरेका रौनियारले त्यहाँ सेटिङ नमिलेमात्र रामनगरबाट ल्याउने गरेका छन् । नवलपरासीका यी दुबै नाकामा कडाइ भएको अवस्थामा रौनियारले रुपन्देहीको धकधई नाकाबाट मोवाइल तस्करी गर्दैआएको स्रोत बताउँछ ।

यसअघिका नेपाल प्रहरीका एसपी काजीकुमार आचार्यले कडाइ गरेपछि उनले धकधईबाट मोवाइल भन्सारछली गरी भित्र्याउँदैआएका थिए । ज्ञानेन्द्रप्रसाद फुयाल एसपीका रुपमा गएपछि पश्चिम नवलपरासीका महेशपुर र रामनगरबाट ब्यापारी रौनियारले भारतबाट भन्सारछली गरी सेटिङमा मोवाइल ल्याउने गरेका छन् ।

तीन महिनाअघि राजस्व अनुसन्धान कार्यालय बुटवलको टोलीले रौनियारले तस्करी गरी ल्याएका मोवाइल बरामद गरेको थियो । ६ महिनाअघि भारतीय कस्टमले पनि उनले तस्करी गरी ल्याउन लागेका मोवाइल बरामद गरेको थियो ।

महेशपुर र रामनगरबाट भन्सारछली गरी भित्र्याएका सबै सामान पश्चिम नवलरासीको बर्दघाटमा लाने र कतिपय सामान त्यहीँबाट खरिद गरेको बिल बनाएर अन्य सहरमा पठाउने गरिएको छ । तर मोवाइल भने त्यहाँ खरिद गरेको बिल बनाउन नमिल्ने भए पनि रौनियारले गोदाम बर्दघाटमै गर्ने गरेका थिए ।

रौनियारले सशस्त्रको महेशपुर गुल्मका इन्चार्ज डीएसपी बिष्णु अधिकारी र सीमा प्रहरी चौकी महेशपुरका इन्चार्ज इन्स्पेक्टर गंगादत्त बडुसँग सेटिङ मिलाएर भारतबाट निर्वाध रुपमा मोवाइल भित्र्याउँदैआएका थिए । बडुलाई वर्तमान गृहमन्त्री रमेश लेखकले महेशपुरमा पठाएका हुन् ।