नेपाल पत्रकार महासंघकाे आसन्न निर्वाचन : प्रेस सेन्टरमा उम्मेदवारको चर्चा

काठमाडौं ।  असाेज ५ गते नेपाल पत्रकार महासंघको निर्वाचनको तिथि तोकिएसँगै चुनावी माहोल तात्तिँदै गएको छ।

काठमाडौं उपत्यकामा प्रेस सेन्टरको बलियो उपस्थिति देखिएको छ र यसपटकको निर्वाचनमा प्रेस सेन्टरले कसलाई उम्मेदवार बनाउने भन्ने विषयले सबैको ध्यान केन्द्रित गरेको छ।

विशेषगरी काठमाडौं र ललितपुरमा प्रेस सेन्टरको पकड सबल रहेको छ । उपत्यकाका क्रियाशील पत्रकारहरूले प्रेस सेन्टरले गठबन्धन नगरी स्वतन्त्र रूपमा उम्मेदवारी दिनुपर्नेमा जोड दिएका छन् । यो दबाबले नेतृत्वसमेत गम्भीर बनेको छ । नेपाल पत्रकार महासंघ काठमाडौं उपत्यकाको अध्यक्ष पदमा टेनिस रोकाको नाम लगभग पक्का भएको छ भने महासचिवमा सागर पन्त र कोषाध्यक्षमा अजित अधिकारीको चर्चा छ ।

त्यस्तै, काठमाडौं जिल्ला अध्यक्षका लागि शोभा अर्याल र ललितपुर जिल्लाका अध्यक्षका लागि रामहरि कार्कीको उम्मेदवारी सुनिश्चित भइसकेको छ । उपत्यकाका केन्द्रीय सदस्यका लागि सूर्य सुवेदी र अर्जुन पन्तको बलियो सम्भावना देखिएको छ, जसले पत्रकारहरूको समर्थन पाइरहेका छन् । खुला केन्द्रीय सदस्यमा फणीन्द्र फुयाल , नवराज दाहालको नाम अग्रपंक्तिमा रहेको छ ।

मधेशी सचिव पदमा प्रवीण चौधरी र एसाेसिएटकाे सचिव पदमा योगेश खपाङ्गीको उम्मेदवारी लगभग तय भइसकेको छ । गठबन्धनको अवस्था र राजनीतिक परिस्थितिले जन्मदेव जैशीलाई अध्यक्ष, महासचिव र वरिष्ठ उपाध्यक्षमध्ये एकमा उम्मेदवारी दिने अवस्था उत्पन्न गराउँदै लगेको छ ।  पदाधिकारीका दाबेदार राेशन पुरी र रामकृष्ण अधिकारीको उम्मेदवारी केमा दिने भन्ने कुरा गठबन्धनको अन्तिम निर्णयमा निर्भर हुनेछ । प्रेस सेन्टरका एक पदाधिकारीले चुनावी समीकरणहरूको आधारमा उम्मेदवारहरूको स्थिति परिवर्तन हुनसक्ने बताए ।

प्रेस सेन्टरबाट महासंघको पदाधिकारीका आकांक्षी अन्य धेरै छन् । वर्तमान लेखा समिति संयोजक लेखनाथ न्यौपानेका अलावा केन्द्रीय सदस्यहरु ज्ञान पौडेल, दीपेन्द्र शर्मा, सरिता बराईली लगायतले पदाधिकारीको आकांक्षा राखेका छन् ।