रौतहटको करुनियामा आगलागीबाट ७ घर जलेर नष्ट लाखौंको क्षति

रौतहट । रौतहटको देवाही गोनाही १ करुनियास्थित मंगलवार अपरान्ह भएको आगलागीबाट ७ वटा घर जलेर लाखौंको क्षति भएको छ ।

बिद्युतको तार सर्ट भएर अपरान्ह ४ बजे भएको आगलागी बाट स्थानीय साबिर हुसेन, नजारुल अन्सारी, अनसारुल अन्सारी, ईद महमद, मजिद अन्सारी, सोबराती अन्सारी र अलिशेर अन्सारीको घर जलेर नष्ट भएको हो । आगलागी बाट घरमा रहेको अन्नपात,लत्ताकपडा ,भाँडा वर्तन, नगदसहित घरहरु जलेर पूर्णरुपमा नष्ट भएर कुल १६ लाख ९० हजार बराबरको क्षति भएको सशस्त्र प्रहरी रौतहटका प्रमुख एसपी बिक्रम हुमागाईंले बताएका छन् ।

सशस्त्र प्रहरी सुरक्षा बेश देवाहीबाट सई कृष्णनन्दन राय यादवको कमाण्डमा खटिएको ९ जना, इलाका प्रहरी कार्यालय देवाही गोनाहीबाट इन्स्पेक्टर कुशाराम कार्कीको कमाण्डमा गएको १० जनाको टोली गौर नगरपालिकाबाट गएको दमकल र स्थानीबासीहरुको सहयोगमा करीब ५ बजेको समयमा आगो पूर्णरुपमा नियन्त्रणमा आएको जिल्ला प्रहरी कार्यालय रौतहटले जनाएको छ । सञ्जय मिश्रा, न्यूज कारखाना