मोरङमा प्रहरीकै सेटिङमा तस्करी, झापामा एसपीका घुमुवाको आतंक

विराटनगर । उपप्रधान तथा गृहमन्त्री रवि लामिछानेको निर्देशनमा प्रहरी महानिरीक्षक बसन्तबहादुर कुँवरले सादा पोशाकका प्रहरी परिचालन नगर्न निर्देशन दिए पनि मातहतका जिल्ला प्रमुखहरुले त्यसको पालना गरेका छैनन् । कार्यालय प्रमुखले अतिरिक्त आम्दानीका लागि घुमुवा परिचालन गर्ने गरेका छन् ।

जिल्लाका एसपीहरुले सरुवा भएर जाँदा आफूसँगै घुमुवा समेत लिएर गएको खुलेको छ । जिल्ला प्रहरी कार्यालय झापाका एसपी मिलन केसीले हवल्दार दीपक आचार्यलाई आफूसँगै झापा लगी घुमुवाका रुपमा परिचालन गरेका छन् । आचार्यलाई एसपी केसीले आफ्नो खटिनु केही दिनअघि झापा सरुवा गराएका थिए ।

जागिरमा प्रवेश गरदेखि नै प्रहरी बृत्त ठिमीको घुमुवा बसेर असुलीमा निलम्बनमा पनि परिसकेका हुन् दीपक आचार्य । केही समयअघि शैलेश श्रेष्ठले भक्तपुरको कौशलटारमा संचालन गरेको जुवा अखाडामा प्रहरीले छापा हानेको थियो । उक्त जुवा अखाडामा प्रहरीले छापा हानेपछि शैलेश श्रेष्ठ फरार भए । शैलेश श्रेष्ठलाई फरार अभियुक्तका रुपमा तस्वीरसमेत निकाल्यो । ठिमी बृत्तका घुमुवा आचार्यले फरार सूचीबाट नाम हटाउँछु भनेर ५० हजार घुस मागेका थिए ।

उक्त घुस मागेको अडियो तरुण दलमा समेत आवद्ध रहेका शैलेश श्रेष्ठले तत्कालीन उपत्यका कार्यालयका डीआईजी शैलेश थापालाई पठाइदिए । उक्त अडियो प्रकरणमा शैलेश थापाले घुमुवा आचार्यलाई निलम्बन गरेका थिए । थापापछि उपत्यका प्रहरीको प्रमुख भएका विश्वराज पोखरेलले घुमुवा आचार्यका निलम्बन फुकवा गरेका थिए । सर्वेन्द्र खनाल आईजीपी भएको समयमा उनको निवासमा कार्यरत डीएसपी गोविन्द कार्कीको निर्देशनमा उनको निलम्बन फुकुवा भएको थियो । निलम्बन फुकुवापछि आचार्य नागढुंगा हुँदै स्वयम्भू बृत्तको घुमुवा भएका थिए । स्वयम्भू बृत्तका इन्चार्ज थिए हालका झापाका एसपी मिलन केसी ।

केसी २०७८ जेठ २९ मा जेलमा कैदसंजाय काटिरहेका गुन्डा नाइके समिरमान सिंह बस्नेतलाई भेट्न गएको आरोपमा स्वयम्भु बृत्तको डीएसपीबाट २ बर्षअघि तानिएसँगै आचार्यलाई पनि काठमाडौं परिसरमा सरुवा गराएका थिए । गुण्डानाइके बस्नेतलाई भेट्न गएका उनलाई नसिहत दिएको भए पनि तत्कालीन गृहमन्त्री नारायणकाजी श्रेष्ठले झापा जस्तो जिल्लाको इन्चार्जमा सरुवा गरेकोमा उनको आलोचना समेत भएको थियो । स्वयंभू बृत्तमा घुमुवाका रुपमा गुण्डानाइके बाघे समूहको जुवा अखाडा संरक्षण गर्ने लगायतबाट आर्थिक लाभ गराएकाले झापा जाँदा पनि उनले सँगै लगेर सादा पोशाकमा परिचालन गरेका छन् ।

यसैबीच,जिल्ला प्रहरी कार्यालय  मोरङका एसपी नवराज कार्कीले पनि आईजीपी कुँवरको निर्देशनबिपरीत क्राइम टोली, अनुसन्धान टोली जस्ता विभिन्न आवरणमा घुमुवा परिचालन गरेको आरोप छ । क्राइम टोली, अनुसन्धान टोलीको आवरणमा राखिएका घुमुवाहरुका कारण मोरङका बिभिन्न नाकाहरूमा व्यापक तस्करी मौलाएको छ । राजस्व छली तस्करी रोक्न सीमा नाकामा खटिएका प्रहरीसँगको मिलेमतोमै तस्करहरूले लाइन मिलाएर दैनिक करोडौंको सामान आयात निर्यात गर्दैआएका छन् ।

नोचा, डुमरिया, रंगेली, सिक्टी भुटाहा, बुधनगर, दरैया, सोराभाग र डाइनिया, मायागञ्ज, चुनीवारी, तरिगामा, मधुमल्ला, कदमाहा र चौकीघाटका छोटी भन्सारबाट पनि तस्करी बढेको छ । एसपी कार्कीले खटाएको टोलीले यी नाकाहरुबाट तस्करी गर्नेहरुलाई लाइन दिएर मासिक दररेट असुली गर्ने गरेको आरोप छ ।