माधव नेपालको दाबी- सरकार ढल्दैन, समाजवादी मोर्चाले कांग्रेसमा चिसो पसेको छैन

काठमाडौं । नेकपा (एकीकृत समाजवादी)का अध्यक्ष माधवकुमार नेपालले सत्ता गठबन्धनमा रहेका दलहरु मिलेर समाजवादी मोर्चा बनाउँदा नेपाली कांग्रेसलाई चिसो नपसेको टिप्पणी गरेका छन् ।

बिहीबार सुर्खेतमा आयोजित समाजवादी मोर्चाको सन्देश सभामा नेपालले मोर्चाका कारण कांग्रेसलाई चिसो नपसेको बताए । उनले कम्युनिस्ट पार्टी मिलेपछि देश बलियो हुने बताए ।

“मोर्चा बनेपछि कांग्रेसमा चिसो पस्यो भन्ने लागेको होला । चिसो पसेको छैन,” नेपालले भने, “कम्युनिस्ट मिलेका खण्डमा देशलाई बलियो बनाउन सकिन्छ । निर्वाचन प्रणाली नै त्यस्तो छ, एक्काएक्लै कसैको पार लाग्दैन ।”

उनले एकतामा शक्ति हुने, शक्तिमा ऊर्जा हुने र ऊर्जामा परिवर्तन गर्ने तागत हुने बताए । अध्यक्ष नेपालले निर्वाचनमा पैसाको चलखेल हुने भन्दै त्यसलाई परिवर्तन गर्नुपर्ने बताए ।