डलर साट्ने बहानामा ठगी गरेको आरोपमा एक जना पक्राउ

काठमाडौं । डलर साट्ने बाहानामा विभिन्न व्यक्तिहरुबाट साढे ३० लाख रुपैयाँ ठगी गरेको आरोपमा एक जना पक्राउ परेका छन् । सिन्धुपाल्चोक बाह्रबिसे नगरपालिका-२ कर्थलि घर भई हाल भक्तपुर बालकोट बस्ने २८ वर्षीय भिम बहादुर तामाङलाई प्रहरीले पक्राउ गरेको हो ।

काठमाडौं उपत्यकाको विभिन्न स्थानहरूबाट फोन सम्पर्क गरी डलर साटीदिन्छु भनि प्रलोभन देखाई उक्त रकम ठगी भएको घटनाको थप अनुसन्धानको क्रममा तामाङको संलग्नता रहेको खुलेको प्रहरीले जनाएको छ ।

काठमाडौं उपत्यका अपराध अनुसन्धान कार्यालय मिनभवनबाट खटिएको प्रहरीले उनलाई भक्तपुर बालकोट बसपार्कबाट पक्राउ गरेको हो । उनलाई थप कारबाहीको लागि प्रहरी वृत सातदोबाटो पठाइएको र घटनामा संलग्न अन्य व्यक्तिहरुको समेत खोजी भईरहेको प्रहरीले बताएको छ ।