रवि लामिछानेको पार्टीका नेतालाई सशस्त्रको करोडौंको ठेक्का दिने तयारी

काठमाडौैं । सशस्त्र प्रहरी बलले ३५ करोड रुपैयाँ बराबरका स्नो पार्का ज्याकेट र स्नो स्लीपीङ ब्यागसहितका हिमाली आइटमका सामान खरिदको टेण्डरमा रवि लामिछानेको राष्ट्रिय स्वतन्त्र पार्टीका केन्द्रीय सदस्य बिष्णकुमार श्रेष्ठको कम्पनीलाई दिनेगरी सेटिङ भएको अर्को तथ्य खुलेको छ । आफूलाई बिष्णु पुरुषका नामले चिनाउने श्रेष्ठ गार्मेन्ट ब्यवसायी हुन् ।

लामिछाने उपप्रधान तथा गृहमन्त्री हुँदै हिमाली आइटमको लागि तत्कालीन अर्थमन्त्री बिष्णुप्रसाद पौडेलसँग भनेर सशस्त्रको हिमाली आइटम खरिदको बजेट छुट्याउन लगाइएको खुलेको छ । सशस्त्र प्रहरी बलको आर्थिक प्रशासनका प्रमुख एसएसपी होम ज्ञवालीले श्रेष्ठको कम्पनीले पेश गरेको नमूनासँग मात्र मिल्ने गरी स्पेसिफिकेसन राखेको आरोप छ । ज्ञवालीले नै अरु ठेकेदारलाई यो पटकलाई बिष्णुको कम्पनीलाई काम दिने भनेर सेटिङमा हिमाली आइटमको ठेक्का दिनेगरी उनको नमूनासँग मिल्ने स्पेक राखेको स्रोतले बतायो । लामिछाने गृहमन्त्री भएकै समयमा श्रेष्ठसँग भएको सहमति अनुसार गएको माघ १९ मा हिमाली आइटम स्नो ज्याके, स्नो बुट, स्नो स्लीपीङ ब्यागको बोलपत्र सूचना निकालिएको थियो ।

अर्थमन्त्रालयले बजेटको सुनिश्चितता गरे पनि निकासा अझै नगरेको उक्त टेण्डर २ महिना पुग्न लागिसक्दा पनि खोलिएको छैन । सार्वजनिक खरिद अनुगमन कार्यालयले सफ्टवेयरमा समस्या आएका कारण उक्त टेण्डर खोल्ने मिति पछि सार्दैआएको छ । सुरुमा चैत ५ मा खोल्ने भनिएको उक्त टेण्डर, चैत ९ मा सारियो । चैत ९ मा समेत खोलिएन ।

सशस्त्रमा अहिलेसम्मकै ठूलो खरिद मानिएको हिमाली आइटम सहितको स्नो पार्का ज्याकेट र स्नो स्लीपीङ ब्यागसहितको ५ किसिमका सामानको ठेक्का चलखेल भएको समाचार बारम्बार आइरहेको छ । तर गार्मेन्ट ब्यवसाय गर्दैआएका बिष्णुकमार श्रेष्ठको नमूना पेश गरी उनको कम्पनीलाई मात्र मिल्नेगरी स्पेक राखिएको तथ्य भने हाल आएर खुलेको छ ।

सशस्त्रको हिमाली आइटम खरिदको टेण्डरमा तपाईको कम्पनीसँग मिल्नेमात्र नमूना राखेर टेण्डर गरी ठेक्का दिन खोजिएको हो भन्ने प्रश्नमा बिष्णुकुमार श्रेष्ठले भने–‘मेरो कम्पनीका कागजात बिभिन्न ब्यक्तिले लगेका छन् । उनीहरुले बोलपत्र मेरो कम्पनीको नाममा हालेका होलान् । मैले सशस्त्रको बन्दोबस्तीका सामानको टेण्डरमा भाग लिएको छैन ।’

कम्पनीको कागजात लगेर अरु ठेकेदारले टेण्डर पेश गर्न दिएपछि तपाईले नै भाग लिएको भएन र भन्ने प्रश्नमा उनले कम्पनी मात्र दिएको हो भने ।