राप्रपाको समानुपातिक सांसद चयनः डा.लोहनीप्रति लिङ्देनको कृतघ्नता

काठमाडौं । राष्ट्रिय प्रजातन्त्र पार्टीका अध्यक्ष राजेन्द्र लिङ्देनले आफूलाई नेतृत्वमा स्थापित गर्ने नेता डा.प्रकाशचन्द्र लोहनीलाई समानुपातिकमा सांसद बनाएनन् । राप्रपाले शनिबार निर्वाचन आयोगमा पठाएको सूचीमा लोहनी पर्न सकेनन् । 

राप्रपाको २०७८ मंसिरमा भएको एकता महाधिवेशनमा लिङ्देनलाई अध्यक्ष बनाउन लाग्ने पुराना नेतामा डा. लोहनीमात्रै थिए । तर लिङ्देनले समानुपातिक सांसद छान्दा पशुपतिशमशेर जबरा र बुद्धिमान तामाङलाई रोजेका छन् । सुरुदेखि आफूलाई साथ दिएका लोहनीलाई सांसद नबनाएर लिङ्देनले कृतघ्न ब्यवहार गरेको आरोप लोहनीका समर्थकहरुको छ । डा . लोहनीको जीवनको उत्तराद्र्धमा सांसद बन्ने चाहनामा कुठाराघात भएको छ ।

पशुपतिशमशेरले महाधिवेशनमा कमल थापालाई सहयोग गरेका थिए । उनले महाधिवेशनको पूर्वसन्ध्याामा थापालाई सहयोग गर्न हस्तलिखित विज्ञप्ति नै जारी गरेका थिए । जुन विज्ञप्तिलाई राजेन्द्र लिङ्देन पक्षले सामाजिक संजालदेखि महाधिवेशनस्थलसम्म ब्यापक बनाएको थियो । लिङ्देनले सांसद बनाएका बुद्धिमान तामाङ पनि कमल थापाको समूहका कमाण्डर थिए । उनले कमल थापाकै समूहबाट उपाध्यक्ष जितेका हुन् ।