काठमाडौँ, ८ जेठ । चीनसँग नेपाली सेनाले खरिद गरेको ८ कन्टेनर स्वास्थ्य सामाग्री स्थलमार्गबाट बिहीबार काठमाडौं आइपुगेको छ । सैनिक प्रवक्ता विज्ञानदेव पाण्डेका अनुसार ती ट्रकले ८ टन स्वास्थ्य सामाग्री ल्याएको छ ।
यसअघि नेपाली सेनाले स्थलमार्गबाट ८ टन औषधि र वाइडवडीबाट करिब १९ टन स्वास्थ्य सामाग्री समेत ल्याइसकेको छ ।अहिलेसम्म सेनाले झण्डै ३५ टन औषधि ल्याएको छ ।
यसैगरी थप १२ वटा कन्टेनर तातोपानी नाकाको चिनियाँ क्षेत्रमा आइसकेको प्रवक्ता पाण्डेले बताए । सेनाले ३ सय ४१ टन स्वास्थ्य सामाग्री खरिदका लागि चिनियाँ सरकारी स्वामित्वको सिनो फर्मासँग सम्झौता गरेको थियो ।
सेनाले ती स्वास्थ्य सामाग्रीका लागि १ करोड ८४ लाख ४१ हजार ७ सय ६ अमेरिकी डलर (करिब २ अर्ब नेपाली रुपैयाँ) पठाइसकेको छ ।
चैत १६ गतेको मन्त्रिपरिषदको बैठकले जीटुजी प्रक्रियाद्वारा स्वास्थ्य सामाग्री खरिद गर्ने जिम्मेवारी सेनालाई दिने निर्णय गरेको थियो ।
