समयमा काम नगर्ने ठेकेदारलाई सरकारले नछाड्ने, २२ निर्माण ब्यवसायीका ठेक्का रद्द

काठमाडौं । तोकिएको समयमा काम नगरी विकास निर्माणका काम अलपत्र पार्ने २२ निर्माण ब्यवसायीको ठेक्का तोडिएको छ । डिभिजन सडक कार्यालय चरिकोट, दोलखाले समयमा काम नगर्ने २२ निर्माण ब्यवसायीको ठेक्का तोडेको हो ।

आर्थिक वर्ष २०७९–८० देखि ठेक्का सम्झौता गरी दोलखा जिल्लाका विभिन्न स्थानमा निर्माण कार्य अलपत्र पार्ने व्यवसायीमाथि कानुनी कारबाहीको प्रक्रिया अघि बढाइएको छ । डिभिजन सडक कार्यालय चरिकोटले शुक्रबार सार्वजनिक सूचना प्रकाशित गरी ठेक्का तोडिएको जनाएको छ ।

त्रिवेणी बिल्डर्सको जिरी–श्यामा–लाप्सा सडक, जिरी–सिक्रे–हावा–भीरकोट–किर्ने रोडको टेण्डर पाएका सूर्य निर्माण सेवा र सुनुवार निर्माण सेवा, तामाकोशी–जिरी रोडको ड्रेन मेन्टिनेन्सको ठेक्का पाएको सम्दुव बज्रपानी कन्ष्ट्रक्सन लगायतका २२ वटा निर्माण कम्पनीका ठेक्का समयमा काम नसकी अलपत्र पारेकाले ठेक्का सम्झौता अन्त्य गरिएको डिभिजन सडक कार्यालय चरिकोटको सूचनामा उल्लेख छ ।

निर्माण व्यवसायीहरुद्वारा निर्धारित समयसीमाभित्र निर्माण कार्य सम्पन्न गर्न नसकेको, सो पश्चात समेत निर्माण व्यवसायीहरुलाई लिखित तथा मौखिक रुपमा कार्य सम्पन्न गर्न पटक–पटक अनुरोध गरेको सूचनामा उल्लेख छ ।

कार्य सम्पन्न गर्ने प्रतिवद्धतासहित उपस्थित भई कार्य सुचारु गर्नेतर्फ निर्माण व्यवसायीहरुले तदारुकता नदेखाऊदा आफ्ना करारिय दायित्व पूरा नगरेकाले ठेक्का सम्झौताका शर्तनामाहरु र सार्वजनिक खरिद ऐन, २०६३ को दफा ५९ (७) समेतको आधार मानी मिति २०८३ असोज २२को निर्णयानुसार ठेक्का सम्झौता अन्त्य गरिएको जनाइएको छ ।

साथै सार्वजनिक खरिद ऐन, २०६३ र सार्वजनिक खरिद नियमावली, २०६४ अनुसार Post termination Evaluation भई स्थापित हुने रकम सरकारी बाँकीसरह असुल उपर हुने कानुनी व्यवस्था भएकाले यो सूचना प्रकाशित गरिएको मितिले ३० दिनभित्र निर्माण व्यवसायीहरुलाई यस कार्यालयमा सम्पर्क राखी वित्तीय फरफारक गर्न समेत अनुरोध गरेको छ ।