चिकित्सा शिक्षा आयोगको उपाध्यक्ष तत्काल नियुक्ति नगरे सत्याग्रह गर्ने डा. केसीको चेतावनी

काठमाडौँ। प्राडा गोविन्द केसीले चिकित्सा शिक्षा आयोगको रिक्त उपाध्यक्ष पदमा अविलम्ब नियुक्ति प्रक्रिया अगाडि नबढाए सत्याग्रह गर्ने चेतावनी दिएका छन्।

आइतबार एक प्रेस विज्ञप्ति जारी गर्दै निष्पक्ष रूपमा योग्यता, दक्षता, अनुभव र स्वच्छ छविका आधारमा मात्र छनोट भएका व्यक्तिलाई उपाध्यक्षमा अविलम्ब नियुक्त गर्न माग गरेका हुन्।

‘राजनीतिक र निजी संस्था लगायत अन्य स्वार्थपरक समूहसँग आबद्ध उम्मेदवारहरू (स्वार्थ बाझिने) हामीलाई स्वीकार्य हुने छैन,’ उनले लेखेका छन्, ‘चिकित्सा शिक्षा आयोगको रिक्त रहेको उपाध्यक्षको पदको नियुक्तिमा ढिलाइले बालेन सरकार विभिन्न स्वार्थ समूहको प्रभावमा परेको प्रस्ट अनुभव हुन्छ।’

यस्तै उनले नेपालका स्वास्थ्य र शिक्षा क्षेत्रका वस्तुस्थिति, चुनौती र समाधानका लागि सल्लाह, सुझाव र मागहरू समेत समेटेर प्रधानमन्त्री, सम्बन्धित मन्त्रीहरू र संसदीय समितिमा बुझाइएको ज्ञापनपत्र उपर आवश्यक कारबाही अगाडि बढाउन सरकारलाई अनुरोध समेत गरेका छन्।